Osagaiak 4 lagunentzat

Tolosako Babarruna ½ Kg., tipula txiki 1, oliba-olioa 5 koilarakada, gatza eta 1,5 l. ur gutxi gorabehera.

Modu tradizionalean prestatzea

Babarrunak eltze batean jarri ur hotzarekin, oliba-olioarekin eta xehe-xehe txikitutako tipularekin.

Eltzea su bizian jarri irakiten hasi arte, gero, sua moteldu eta babarrunak gutxi gorabehera bi ordu t'erdiz makal irakiten eduki. Egiten ari diren heinean, eta beharrezkoa baldin bada, ura botaz joan.

Babarrunak ondo eginda daudenean, gatza bota eta su motelean eduki minutu batzuetan. Jateko atera baino lehen, sutatik kanpora utzi salda loditzeko.

Presiozko eltzean prestatzea.

Presiozko eltzea erabiltzen bada nabarmen jaitsiko da egosteko denbora. 30 minututan jateko prest izango dira babarrunak.Babarrunak eltze batean jarri ur hotzarekin, oliba-olioarekin eta xehe-xehe txikitutako tipularekin. Egoste-denbora eta behar den ur-kopurua kalkulatzeko eltzearen argibideak irakurri.

Babarrunak ondo eginda daudenean, tapa kendu, gatza bota eta su motel-motelean eduki minutu batzuetan. Jateko atera baino lehen, sutatik kanpora utzi salda loditzeko.

Aurkezpena eta lagungarriak

Bakoitzak duen gustu eta irudimenaren arabera. Tradizioa babarrunak eltzean bertan ateratzea da, eta batez ere, txerri-haragia (odolkia, txorizoa, saiheskia, urdaia...) aza egosia eta Ibarrako Piparrak izaten dituzte lagungarri.

Ohar batzuk

- Bezperan egin: Salda lodia gustatzen zaienei, hori lortzeko aukera izango dute babarrunak bezperan egin eta hurrengoa egunean jateko uzten badituzte.

- Lagungarriak nahastu edo ez: Mahairatzeko garaiean, gauza bakoitza bere aldetik aurkeztea gomendatzen dugu, horrela, zaporeak ez ditugu nahastuko. Ondoren, bakoitzak bere nahia egin dezala.

- Beratu: Tolosako babarrunarekin oso ohikoa ez bada ere, nahiago baldin badugu beratzen jar ditzakegu. Hori eginda egoste-denbora laburtzea lortuko dugu, baina kontu eduki erabili behar dugun ur-kopurua ere, gutxitu egin beharko dugula.